Bisedimet për koalicion në Itali mes Lëvizjes populiste Pesë Yje (M5S) dhe Partisë Demokratike (PD) të qendrës së majtë kanë ngecur, pasi M5S insiston që Giuseppe Conte të mbetet kryeministër i vendit, transmeton Anadolu Agency (AA).

Përmes një kumtese, nga M5S thonë se takimi i së hënës që zgjati katër orë mes tyre dhe PD-së nuk dha rezultate.

Në kumtesë thuhet se M5S nuk do të mbajë takim të ri me PD-në nëse kjo e fundit nuk thotë “po” për mbetjen e Contes në funksion.

M5S gjithashtu ka anuluar takimin me PD-në që ishte planifikuar të mbahet sot në mbrëmje.

“Nëse ata dëshirojnë që të shkojnë në zgjedhje, duhet ta thonë këtë hapur. Ne rikujtojmë se M5S është partia më e madhe politike në parlament”, thuhet në kumtesë, duke iu referuar PD-së.

Bisedimet për të formuar një koalicion të ri në Itali filluan javën e kaluar pas dorëheqjes së Contes, pasi u prish koalicioni mes partisë populiste M5S dhe partisë së ekstremit të djathtë “Lega Nord”.

Tensionet mes ish partnerëve të koalicionit u përshkallëzuan për shkak të një projekti infrastrukturor që përfshin një lidhje hekurudhore të shpejtë me Francën.

Të dyja palët fajësojnë njëra-tjetrën për ndarjet e thella në koalicion, gjë që çoi që Salvini të kërkojë zgjedhje të reja.

M5S dhe partia e Salvinit formuan një qeveri koalicioni më 1 qershor 2018 nën udhëheqjen e kryeministrit teknokrat Conte.